Friday, December 21, 2007

صباح الخير

صباح الخير


صباح الخير .. سعيدة .. good Moring .. Bonjour .. حني عمت صباحاً يا عماه ... كلها تعبيرات تنفع لحاجات كثيرة موجودة في حياتي محتاج أقولها صباح الخير ... منها طبعاً تلك المدونة الغالية ... أما أهم حاجة محتاج أقولها صباح الخير هي المذاكرة طبعاً ... يلا الحمد لله علي كلا حال ...


بس فعلاً الموضوع في أوقات كثيرة بتكون ضاغطة علي الإنسان تمنعه من عمل أشياء كثيرة قد تجب عليه فما بالكم بأشياء يحبها ... مشكلة تنظيم J


طبعاً بما أن الواحد أصبح يجلس في البيت فترة من الزمن أكبر قليلاً من الفترات السابقة فهنا تأتي الفرصة للكتابة فليس كل الوقت للمذاكرة كما تعلمون ... ولا مانع من مشاركة الجميع في مذكرات واحد يذاكر ( واحد مجتهد جداً ) ...


الشتاء


أجمل ما في هذه الفترة ذلك الجو الجميل ... فأنا من محبي الشتاء فالجو يكون رائع جداً وأنت تمشي علي النيل والهواء البارد يضرب في وجهك في عنف ... كدا كدا الوقفة علي النيل كفاية فمع البرد لا والله شعور مختلف أكيد ...


المشكلة في المذاكرة في البرد شيء هام للغاية هي كيفية الخروج من تحت البطانية بعد النوم الطويل لعمل أي حاجة سواء المذاكرة أو غيرها ... ولكن الحمد لله قدرتي علي القيام كبيرة للغاية فلا يمر ساعتين إلا وأنا في الحمام من أجل غسل وجهي ... دنيا ..


بالنسبة لنوم ففعلاً الواحد بينام في هذه الفترة أكثر من أي وقت مضي ... طبعاً ليس هروب من المذاكرة لا قدر الله ولكن أري أن السبب الرئيسي في الموضوع دا ( مش رئيسي أوي بس رئيسي وخلاص ) أن معدل حركة الجسم في هذه الفترة قصيرة وأن الواحد لا يقوم بأي تجارب حركية تماماً اللهم إلا النزول من أجل الصلاة وطلبات البيت ...فنصيحة من طالب مجتهد ( مجتهد أوي كمان ) ألعب خمسة سويدي قبل ما تذاكر ... وقبل ما تنام عشان تصحي بسرعة ونشاط ( إلا لو أنت بتفضل الهروب )


أحبائي في الله


قد يكون أكثر من يتعبني في هذه الفترة هي قلة اتصالي بأحبابي في الله فكل منا مشغول بمحاولة إنقاذ ما يمكن إنقاذه ... ولكن يعلم الله وحده كم أشتاق إلي كثير ممن أحب وأني لا أنساهم في دعائي أبداً ...جمعنا الله في مستقر رحمته ...


ملاحظة أخيرة


الامتحانات تبدأ مع بداية العام الجديد ( الواحد مش هيعرف يقصي ليلة رأس السنة كدا ) ... فلا تنسونا من دعائكم لآخوكم الغلبان عشان ربنا يبسترها ... وإن شاء الله هحاول أكتب سريعاً عن الفترة الجميلة دي عشان لما يتذكرها بعد ذلك بيكون مسرور ( شوف كدا صوت المعركة ) ... يعني ليا مش لحد تاني J ... ومازال التنفس يأتي بصعوبة ما دام هناك مذاكرة ... يلا سلام عليكم ...

13 Comments:

At 4:39 AM, Anonymous bebo said...

يااااااااه عاش مين يقرا بوستاتك

جميل قوى

صباح الخيييييييييير عليكوا كلكوا

 
At 4:43 AM, Blogger ناسها وأهلها said...

السلام عليكم ورحمة الله وبركاته..

ازيك يا واد يا أستاذ إبراهيم يا حبيب قلبي من جوه وبره ومن كل حته.. والله إني أحبك في الله.

وبعدين كلنا يا بني مطحونين سواء في المذاكرة أو في الشغل.. كله مطحون وفي الفترة اللي الواحد بيكون مطحون فيها ما بيبقاش عارف يبص جنبه أو حتى يتصل باصحابه.. بس هتلاقي نفسك كده مره واحده عايز تتوقف عن المذاكرة وعايز تشوف اصحابك أو تتصل بيهم بأي طريقة علشان تفصل شوية من المذاكرة اللي بتاكل الدماغ.. ربنا يرزقك ويرزقني البركة والسعة في الوقت والرزق.. اللهم آمين.

عبدالمنعم عطوة أفندي

مدونة: عايش مع إيقاف التنفيذ
http://mouslem-way.maktoobblog.com/

 
At 5:00 AM, Blogger المجاهد said...

حمدا لله على السلامة يا باشا

وحشنا تدوينك من زمان

فينك يا راجل

 
At 6:36 AM, Blogger mohamed said...

كل سنة وانت طيبة

وصباح الخير عليكو

 
At 2:40 PM, Blogger وضـّاح said...

حمدا لله على سلامتك

كل عام وأنت بخير وتقبل الله منا ومنكم

أعانك الله على امتحاناتك

 
At 3:58 PM, Blogger saiaf said...

ايه ده ... ؟
مين ... ؟
شرقاوى ...؟
بيذاكر ... ؟!!

يا الله ... و ده من ايه ده يا ابنى ..؟:)

لا و ايه كمان .. بيلعب سويدى :)

صباح الخير يا مان

الحمد لله ان انت صحيت

على العموم بقى ابقى ادعيلى معاك علشان انا ذيك بالظبط

بس مش بلعب سويدى :)

 
At 8:15 PM, Blogger camellia said...

طيب صباح الخير وصباح كل الحاجات الحلوة
وربنا معاك في المذاكرة
وكل سنة وانت طيب
وعيد سعيد
وايه كماااااااااااان
آه
صباح الخير برضه

 
At 5:33 AM, Blogger محمد جمال الياسرجى said...

ربنا معاك ويقويك فى المذاكرة

 
At 10:27 AM, Blogger DR.HAMAS said...

ربنا ييسر لك الأمر أخى الحبيب

و تعرف تذاكر كويس

و بعدين الحال من بعضه

كلنا ذاك الرجل

الذى يتنفس بصعوبة

مع حلول الامتحانات

ههههههههه

د.حماس

 
At 4:37 AM, Blogger إخوانى مخربش said...

سبحان الله موسم الامتحانات ده بيبقى كحت فى التدوين

اعتقد ان ظاهرة كويسه ان معظم المدونين من الطلبة

يارب يستمروا فى التدوين بعد الكلية

 
At 9:05 AM, Blogger أسد مسجون said...

ربنا ييسرليك الخير ان شاء الله ومطقعتشي مره واحده كده

 
At 1:19 PM, Blogger مدونة يلا نفضحهم said...

الى كل حر فى هذه البلد
سلام عليكم ورحمه الله وبركاته
ابعث أليكم بهذه الرساله من داخل زنزانتى
فأشهد الله انى احبكم فى الله
فلقد اعتقلت انا واخرين من خيره رجال هذه البلد
فى تهمه هى وسام على صدورنا جميعا
فكنا نقف كما وقفتم انتم ضد حصار غزة
وهذا مالم يعجب ضباط امن الدولة
فتم اعتقالنا وعلى الرغم من صدور قرارت قضائية
بالافراج عنا ولكن لا يتم التنفيذ
وعلى الرغم من حالتى الصحية التى تحتاج ان
اكون تحت اشراف الاطباء
ولكن كلنا فداكى يا فلسطين
فداكى روحنا ودمائنا واموالنا
اخوانى الكرام
انتهت رسالتى لكم من داخل زنزانتى
ووالله لو أملك المقدرة على ان اصافح ايديكم الطاهره
واقبل جبهاكم التى ترفض الركوع لغير الله لفعلت
ولكن عذرى
انى اتلقى كل يوم رسائل منكم انتم معشر الشباب
فكم كانت هى اسعد اللحظات عندما كنت اتحدث اليكم
وها انا افعلها الان
اخوانى المدونين الاحرار
جزاكم الله عنى كل خير
د\ ابراهيم الزعفرانى
امين عام نقابة الاطباء بالاسكندرية
المعتقل بتهمه
المطالبه برفع الحصار عن غزة
=============================================
للتوقيع على وثيقة الافراج عن
الدكتور ابراهيم الزعفرانى

اضغط هنا
http://yallanefdahom2.blogspot.com/2008/01/blog-post_3398.html

 
At 1:16 PM, Blogger Hosam Yahia حسام يحى said...

مدونه جميله ماشاء الله

ساكرر الزياره ان شاء الله


تحياتى

 

Post a Comment

<< Home