Wednesday, May 23, 2007

صوت المعركة

لا صوت يعلو فوق صوت الإمتحانات والمذاكرة، هذا بالفعل ما يعيشه الآن طلاب مصر المحروسة علي اختلاف أطيافهم، والاستعداد للحرب ( قصدي الإمتحانات ) يأتي علي قدم وساق في غالبية الثكنات العسكر.. ( يا جماعة قصدي البيوت ) إستعداداً لتلك الأيام العصيبة، والكل يستعد علي طريقته الخاصة ودا بيكون دائماً حسب نوع الدراسة والمادة ... ربنا يعين الجميع.


وتأتي دائماً المشكلة من البيئة المحيطة بيك ( ما هو لازم نلاقي سبب لأي مشكلة بعيد عننا ) وهتلاقي المحاولات الشرير لمحاولت تشتيت ذهن الطالب المصري الهمام وما يمكن أن نسميه المؤامرة العالمية الكبري، فعلي سبيل المثال لا الحصر علي المستوي الكروي هتلاقي أحلي ماتشات الأيام دي فكان تشلسي والمان يونيتد في نهائي كأس انجلترا ( كوسة طبعا تشلسي يكسب )، ومن بعده الأهلي والزمالك ( طبعاً أنا هنا لا أقصد الكورة العالمة تماماً ونعتذر لها بشدة بس الظروف بقا )، دا غير نهائي دوري أبطال أوروبا بين ليفربول وميلان في أثينا ( ماتش جامد طحن الصراحة )، كل دا كوم والدوري الأسباني إلي مولع نار دا كوم آخر ... ربنا يهدينا كدا.


وعلي الرغم من الاغراءات السابقة وفي محاولة لإنقاذ ما يمكن إنقاذه، فكان لا هناك مفر من إتخاذ القرار الحاسم والمصيري في الإعتزال التام والكامل للحياة العامة بجميع أشكالها وألوانها وذلك حتي نهاية الموسم الدراسي، فهتلاقي موبيله تم القضاء عليه بجعله rhythmic backlight فقط لا غير وإلي عاوز يوصلي يبقي يبعتلي ماسج، الكمبيوتر ذلك الإختراع الجاذب لي بشدة فقد قررت إبعاده تماماً عني، طبعاً دي هتكون آخر تدوينة ليا لا يتبقي حاجة تانية غير الخروج إلي هو مستحيل أساساً.... بس كدا ربنا يسترها علينا.


خاطرة غريبة كدا جالت علي خاطري وأنا بذاكر ( طبيعي إن أي طالب بيذاكر )، إن الواحد في بداية فترة المذاكرة و بعد فترة من الإنقطاع الطبيعي عن المذاكرة وبداية دراسة مواد جديدة فتجده بيخبط هنا شوية وهناك شويتين لحد ما يعرف الوضع الطبيعي والأمثل، وهكذا الإنسان في حياته حين يوضع في مكان او تجربة جديدة سظل في فترة من التخبط حتي يصل إلي الشئ الأمثل في التعامل مع الموقف في ظل المعطيات الجديدة التي لديه والثوابت التي توجد لديه من خلال خبرته في الحياة، وعلي ذلك فليس من العقل أن يحكم علي انسان من خلال موقف وحيد في تجربة جديدة ...يلا لعل الناس تفهم.


قبل ما أنهي تدوينتي بالحديث عن الأجازة الكبيرة والطويلة لاحظت خلال الفترة إلي فاتت إن الناس بتحلم ببعض كثير الأيام دي والجميل إن بعض الأحلام بتكون مش كويسة والناس بتحكيها، والغريب إن الناس كلها حلمت ليا نفس الحلم بس بأشكال متعددة يعني من أول والدة واحد صحبي إلي الأصحاب أنفسهم لحد ما وصلت ليا والنهاية واحدة، دا انا عاوز أنام في بيتنا والله ... ربنا يسترها علينا.


مرة حبيبي أحمد السباعي كان بينصحني فقالي حاول تكون جبهاتك في الحياة قليلة عشان تعرف تشتغل صح ولا تضيع إمكانياتك في أشياء متعددة فيكون الأثر النهائي ضعيف، صحيح إني أعرف أهدافي جيداً وقدراتي ودائماً ما أحاول السيرفي الطريق الذي آراه يحقق تلك الأهداف ، وانا كنت قررت أخذ بنصيحة حبيبي السباعي ولكن إكتشفت وانا أعد العدة لهذا الصيف القدام إني من غير أن توجد أشياء جديدة قد تطرأ علي الوضع هناك 14 جبهة مختلفة في أماكن مختلفة منهم فعلاً 7 حاجات يمكن أن تكون لوحدها ولا حاجة جمبها، ربنا يبارك في الوقت إن شاء الله ونحاول نقلل تلك الجبهات ولا يطلع لينا جبهات جديدة.


حكمة الأسبوع : أصحاب العقول العظيمة لديهم أهداف وغايات ... أما الآخرون فيكتفون بالأحلام.


في النهاية لا أجد شيئاً أقوله غير أني ارجو الدعاء الشديد لي، في دعائكم وسجودكم بصلاتكم وقيامكم باليل، فأنا فعلاً في أشد الحاجة إلي هذا الدعاء، والأجر والثواب من عند الله، ولو واحد يعني عاوز حاجة هبقي أعزمه علي أحلي نسكافيه من إختراعات مطبخنا ونحن غير مسؤليين عن صحة الزبائن، ربنا يكتب إلي فيه الخير ويرجعنا علي خير بعد فترة الحرب وعلي فكرة أنا هبدأ يوم الأحد القادم من 9 إلي 11، والسلام عليكم ورحمة الله وبركاته.

25 Comments:

At 6:39 AM, Blogger خطــاب said...

حكمة جامدة فعلا من السباعى

:)

و ربنا يوفقك و يوفقنا يا شاشا

 
At 6:44 AM, Blogger بن توفيق said...

انا هرد رد موجز وسريع كده يا عمو شرقاوى

ربنا يعينك يا رب يا حبى فى المذاكرة .. ويوفقك كده فى الامتحانات

حكمة السباعى جامده جدا .. ربنا يعينك


حبيبى لا تقلق .. مش هتروح دلوقتى .. لسة بعد الامتحانات
يعنى قدامك فترة تقعد فيها فى بيتكم

بس يا حبى .. عايزك اول ما تروح تنسى ان فيه واحد تعرفه اسمه بن توفيق

انسانى .. عشان احبك وارخد انا بالى من والدك ووالدتك

مش معقول تجيبنى معاك ووالدك ووالدتك محدش يطمن عليهم

 
At 7:16 AM, Blogger ومضات .. أحمد الجعلى said...

حتى التدوينة قلبتها صوت المعركة والمعسكر و... وفى الآخر مش عايز الناس تحلم لك بالأحلام العظيمة اللى بيشوفوها لك!!

وبصفتى بامر الآن لاول مرة فى حياتى بهذه الأيام دون امتحانات فبقول لكم شدوا حيلكم يا شباااااب هانت وفقكم الله

هانت يا شرقاووووو

 
At 7:43 AM, Blogger Saif Allah said...

ربنا معااك يااشاارقو ومعانا كلنا


ياارب وفقنا ونجحنا

Abdo Saleh

 
At 8:59 AM, Anonymous Anonymous said...

ياشرقاوي ياصاحبي الحكمة بتاعت استاذنا احمد السباعي جامدة جدا بس المشكلة في حاجة في حكمة تانية اقصد وهي تنفعك(مهما تعلم في المتبلم يصبح ناسي)0
يابني الحكم كتيرة بس اللي يطبق واللي يفهم واللي ميصبحش ناسي0
عمك عز

 
At 10:54 AM, Blogger عمر عاشق القرآن said...

ربنا يعينك و يعينا ويعين الجميع
عجبتنى الحكمة اوى

 
At 11:02 AM, Blogger AbdElRaHmaN Ayyash said...

:D
ايه يا عم
معركة مين
دي حرب و الله :D
ربنا يوفقك ويوفقنا
الحكمة دي تنفع
شوية
ربنا يستر
سلام

 
At 5:53 PM, Blogger محمد said...

ربنا يعينك
ويعين كل اللي بيمتحنوا

بمناسبة حديثك عن الإغراءات والأعذار والحاجات دي

اقرأ البوست ده عندي

هنـــا

 
At 9:32 PM, Blogger cleopatra said...

ايه ده .. ايه ده !!

معركه !!



ربنا معاك يا شرقاوي .. ويفقك ان شاء الله في الامتحانات .....

 
At 11:39 PM, Blogger علاء عارفين said...

كلنا لها يا باشا

المشكله بقى ان انت تبقى مش مقتنع ان انت اتزنقت و المفروض تذاكر زي حالاتي كده

صحيح هما اربع مواد بس ربنا يعين الجميع

 
At 2:09 AM, Blogger اسماء العريــان said...

كان الله فى العون

عجبتنى اوى حكمه الاخ سباعى

 
At 7:15 PM, Blogger The Manager said...

جميل قوى كلامك
الواحد اتحمس يقوم يزاكر شوية

ربنا يوفقك يا شاركوا يارب

 
At 4:29 AM, Blogger اروي الطويل said...

ويا سلام بقي
لما المواهب تطلع ساة المذاكرة
كاريكاتير تلاقي كتابات مووت تلاقي
رسم بروفيلات تلاقي
تصميمات جارفيكس تلاقي
حاجات غريبة ....برضه تلاقي
بس أنا مش مقتنعه بحكاية الكورة
فيهاايه يعني لما فريق يلعب قصاد فريق تاني يعني نا مش مستعده اقعد ساعتيين قدام التليفزيونعلشان اتفرج علي 22 واحد بتخانقوا علي كورة اصوت لما يدخلوها جون وأشد شعري لما تييجي في العارضه
رأيي معلش

 
At 4:34 AM, Blogger sharkawoo said...

خطاب ...

أكيد طبعاً أي حاجة السباعي يقولها جامدة ... بس لما أشوفه بس :D

وربنا يوفقنا جميعاً إن شاء الله يا خطخط :)

***

بن توفيق

إدعينا كدا يا حاجي ...

بالنسبة للموضوع التاني فأنا أفضلك عدم ذكره عشان بجد هتكون أول إسم ...

وبالنسبة لوالدي والدتي عندي أخوات رجالة كثير اوعي تقلق...

روحت وتوكل علي الله وانا هتصرف :D


***

عمي الجعلي

أعمل إيه طيب يا عمو الدنيا بقت صعبة آخر حاجة ...

بس لا تقلق في احلام كويسة ولا حضرتك نسيت علم بتاع العصر لما هربت يلا هنقول إيه بقا ...

لا تنسانا يا أستاذنا من دعائك

***

ربنا يكرمك يا عبدو باشا

اللهم آمين ...

***

عز

نفسي أقولك كلام كثير بس لما أشوفك أفضل عشان لا دم يتبعتر هنا ولا هناك ولا حاجة ...

المهم صحيح مين إلي يطبق.

***

عمر باشا

ربنا يعين الجميع ... اللهم آمين ...

ربنا يكرمك ما هو دا السباعي.


***

 
At 5:26 AM, Blogger sharkawoo said...

عبدالرحمن عياش

إنها طبول الحرب علي حسك

بس حلو الحكمة تنفع شوية .. وشوية لا :D

لا جامدة جامدة ...

ربنا يسترها علينا فعلاً...


***

أستاذي وضاح

ربنا يكرمك يا حبيبي... لا تنسانا دائماً من دعائكم ...

علي فكرة الموضوع دا جامد اوي ...


***

الأستاذة كليوبترا

ربنا يكرمك ... ويعينا جميعاً ...

ونعدي بقا السنة دي ...

***

DR NIGHTWING

كلنا لها صحيح

الموضوع الزنقة دا رهيب بجد ... بتصحي براحتك وتاكل براحتك ...

ربنا يسترها علينا ويوفقنا ...

***

الأخت أسماء العريان

اللهم آمين ...

ربنا يكرمنا ...

***

مانجر باشا ...

ربنا يكرمك يا جميل ...

طيب ما تخذنا نذاكر مع بعض كدا ولا حاجة :D

ادعلنا كدا يا أستاذ ...

***

الأخت أروي الطويل ...


ما هو حضرتك وكل واحد وإلي بيحبوا ...

حسب ما تحب تظهر لك تلك المواهب في فترة الإمتحانات ولفترة طبعاً محدودة ...

في الاجازة ولا تلاقي حاجة ...

بس طبعاً رأي يحترم :)

 
At 6:06 AM, Blogger اروي الطويل said...

من فضلك حاول تدخل عندي دلوقتي
تاني معلش

 
At 6:22 AM, Blogger Alaa said...

السلام عليكم
أول زيارة و الانطباع الأول :)
المدونة تحفة يا عم :)

بس عجبني جداً كلام صاحبك سباعي عن انك تركز في حاجة فعلا
صاحب بالين كداب
و طبعا التركيز في شيئ أفضل من الترنح بين خمسموت حاجة و في الاخر منطلعش بنتيجة

و ربنا يوفق جميع اخواننا اللي بيمتحنوا
و اهم حاجة يركزوا
المسلم متفوق
و ليس فاشلا

جزاكم الله خيرا

 
At 7:29 AM, Anonymous Anonymous said...

ربنا يوفقك يا شرقاوي

جميل جدا انك تستفيد حتي مما وراء المعركة قصدي المذاكرة :)

 
At 4:24 AM, Blogger Sanaa basha said...

الأخ شرقاوى
أحب بس أقول لحضرتك ان من غير أى تجديدات ، عندى 23 مهمة لانجازها فى الصيف وكل واحدة فيها عاوزة الصيف لوحده /هل هناك افتكاس لتمديد ساعات اليوم الى 36 ساعة مثلا
أو افتكاس لاختزال وقت النوم وتعويضه ببخاخات
الله اعلم
سأبحث

 
At 2:50 AM, Blogger sharkawoo said...

الأستاذ علاء ...

في البداية نشكركم علي الدخول ...
وما نحن إلا تلاميذكم ...

كلام حضرتك صحيح طبعاً ...

وإن شاء الله جميع المسلمين متوفقين وليسو فشلة ...

*****


مصراوي أوي ...

جزاكم الله خيراً في البداية علي التشريف ..

اكيد لازم الواحد يتعلم علي طول

جزاكم الله خيراً...

*****

الأخت سناء

والله دي مشكلة كبيرة ...

هو لو ينفع يعني يبقوا 48 كمان يبقي كويس جداً بالفعل ...

والله حضرتك الحاجات بتزيد كل يوم ومش عارف هنوصل لفيين في الآخر ...

يا ريت لو حضرتك لقيتي إفتكاسة لا تحرمينا منها ...

 
At 4:08 AM, Anonymous Anonymous said...

الله عز وجل وجل يقول في حديث قدسي (لاتسبوا الدهر فانا الدهر)
لما انا كمؤمن بالله ومطيع له الاربعة وعشرين ساعةبتوع اليوم يكفوا لاي حاجة بس الهمم اللي تخلص 0
معلومة :في مرة قسموا عدد المجلدات اللي الفها الامام ابن القيم عمره وجدوا انه كان بيالف في السنة حوالي 10مجلدات او رقم قريب من ده0
احفظوا الله يحفظكم في اوقاتكم ويبارك لكم في اعماركم

 
At 4:20 AM, Blogger ياسر سليم said...

نتشرف بدعوة سيادتكم والأسرة الكريمة لحضور إفتتاح المدونة الصاعدة بإذن الله .. كلماتى .. والعاقبة عندكم فى المسرات ..
حضروكم يسرنا ..
ودخانكم يضرنا ..

 
At 5:30 AM, Blogger أبو نضال said...

ربنا يعينك و يعينا جميعا

تدوينة رائعة

اللهم افتح علينا فتحا طيبا مباركا من عندك...آمين

 
At 5:33 AM, Blogger عاشقة الرحمن...سميه العريان said...

ربنا يوفق حضرتك فى الامتحانات

وتكون معركه ناجحه باذن الله

 
At 6:38 AM, Blogger أحمد السباعـي said...

السلام عليكم
حبيبي شرقاااوي هانت خلاص
كلها يومين وتخلص
شد حيلك

وزي مابيقولوا الصيت ولا الغنى
الله يهديك ، ويباركلك في وقتك وجهدك
وأفكارك ويعز بنا وبك الدين
اللهم آميــن

 

Post a Comment

<< Home