Tuesday, July 17, 2007

نجوم أبحث عنها ...


قبل ما أكتب ...

في محاولة جادة ( فعلاً جادة ) مني أحاول هذه الأيام أن أعيش لحظات من السعادة وفرح والشعور بها ... في وقت قد يكون بالفعل هناك أشياء تدعو لذلك ولكن العكس موجود أيضاًَ بل والكثير منه أيضاً ... ولكن لا مانع من التوقف من النظر إلي تلك النظرة ( التي يعملها الكثير عني ) فترة يعني نوع من الهدنة مع النفس ... لعلنا نتنفس بقليل من الصعوبة في هذه الحياة ...


سر السعادة حاجات كثيرة منها إن صاحب هذه المدونة قد أتم الله نجاحه علي خير حال ولله الفضل والمنة ( عارفين طبعاً شعور واحد بيسمع أغنيه مالقتش حد فرحان في الدنيا زي الفرحان بنجاحه ) ... أجمل حاجة في الموضوع بقا إن النتيجة كانت علي النت ... فلا مجال إن حد يعرف النتيجة إلا إلي هيأخذ رقم جلوسك منك أنت شخصياً طبعاً ... يعني مش تروح الكلية يوم النتيجة الناس كلها شافت النتيجة بتاعتك وأنت يا عيني لسه ما شوفتش حاجة ... إلي يقولك مبروك يا ريس وإلي يقولك مش كنت تذاكر اكثر من كدا ( ناس غريبة للغاية ) ... دي كانت أهم حاجة في موضوع النتيجة دي ... الغريب إني بردوا مش أنا إلي جبت النتيجة أصل كنت مسافر في الساحل الشمالي وخليت حد يجبهالي ... بس عبال ما وصلت القاهرة كانت الجميع علي علم بالنتيجة حتي أهل البلاد الآخري ... يلا الحمد لله علي كل حال ... طبعا ذلك الخبر جعل من السفرية طعم آخر ... وكان هناك حديث بيني وبين النجوم ... وانا هنا وأنا عائد ... وهنا أعود مرة آخري لكتابة الخواطر التي أعيشها وأشعر بيها مرة آخري ... ذلك النوع المفضل لي كثيراً في الكتابة ...


نجوم أبحث عنها ...



هناك نعمٌ كثيرة محروم منها أهل القاهرة وأهل المدن الكبير علي الدوام ... منها رؤية السماء صافية يزينها ويضيئ نواحيها نجوم لامعة لا تختفي .... وذلك بالطبع بسب الهواء الغير صالح لتنفس ( ممكن عشان كدا الواحد بيتنفس بصعوبة !! ) ... ولكن الحال يختلف كثيراً وأنت خارج القاهرة فالسماء صافية للغاية تراها بوضوح شديد كأنها عروس ليلة عرسها تسر كل من ينظر إليها ... ويال الروعة حينما تكتمل تلك الصورة البديعة وانت تنظر إلي السماء وتسمع صوت البحر يضرب بأمواجه علي الشاطئ ... لا توجد حينها غير أن تقف أمام ذلك المشهد تحدثه ويحدثك ... تحكي له ويحكي لك ... وفي النهاية تخرج بصدر يملأه الفرحة والنشوة ... تخرج منتظراً تلك اللحظة التي تعود فيها إلي ذلك المكان مرة آخري ...


ولكن الصورة او الخاطرة التي علقت في رأي وظللت أفكر فيها حتي لحظات كتابتي لهذه التدوينة هو علاقتنا بالنجوم فدائما ما أحاول أن أركب العلاقات بين الأشياء بظواهر واضحة في الطبيعية لا يمكن أن ينكرها إنسان ... ففي السماء اعداد لا تنتهي من النجوم ... تتفاوت في حجمها ولمعانها ...( بالطبع لن أخذ بتلك النظرية الخالدة التي يقولها الكثير ممن ينظرون إلي السماء باعتبارها سجادة زرقاء كبيرة وفيها شوية دبان منور حسب أقوال الأخوان تيمون وبومبا ) ... ولكن ما جال بخاطري بالفعل هو علاقة الإنسان بالآخريين لها الكثير من علاقته بالنجوم ... فهناك نجوم لا تختفي ولا يتغير مكانها في السماء من السهل الوصول إليها والإستدلال بها في أي وقت وفي أي زمان ... هؤلاء كالأصدقاء والاخوان الحق دائما معك في كل اللحظات والأوفات ... وجانب آخر هي نجوم كعامة النجوم تظل في السماء ولكن لا يتذكرها أحد قد ننظر إليها طويلاً في لحظة ولكن سرعان ما ننظر إلي آخري ننسي مكانها وشكلها فهي مثل ملايين آخريين ... هنا يأتي السؤال يا تري من هم النجوم المؤثرة في حياتك التي هي بجانبك علي الدوام ؟؟؟... فهؤلاء نعمة لا غني عنها في الحياة ... ولكن أين هم ...

35 Comments:

At 3:26 PM, Blogger Saif Allah said...

فعلا ياااشاارقو الاحساااس دا ممتمع جدا جدا جدا وبحبه بشدة وبحرارة :D

 
At 3:28 PM, Blogger محمود سعيد said...

شكلك روحت أسكندرية تانى :-)

 
At 3:29 PM, Blogger Rehab Saber said...

ولكم بااك .. مبروك يااخى النجاح :)

.. فعلا احنا محرومين من الحاجات دى فى القاهرة .. بس النجوم قبيل الفجر بردوا فى القاهرة غاية فى الروعة ..

الحمد لله على هذه النعمة ..

 
At 11:24 PM, Blogger belal said...

مبروك النجاح يا سيدي..وخد شوية ورد أهم

 
At 2:14 AM, Blogger ومضات .. أحمد الجعلى said...

معلش يا سرقاوووو استحملنى عندى سؤال شوية بعيد عن الموضوع

بس هيا الصورة اللى انت حاططها فوق دى النجوم اللى فيها بتتحرك وبتمشى ولا عينايا انا اللى بتزغلل!! ياريت ترد عليا بسرعة يا سرقاووو

معلش نسيت النقط على السين أصدى الشين من الزغللة

 
At 9:21 AM, Blogger نـــــــور said...

ألف مبارك النجاح أخونا الكريم

وفعلا منظر النجوم بيكون جميل جدا جدا وسط السما

زي النجوم اللي هما اخوانك وحبايبك اللي بينوروا حياتك

تحياتي على التشبيه الجميل والبوست الأجمل..

 
At 9:45 AM, Blogger محمد محيي الدين said...

اولا ..مبروك النجاح مع اني باركتلك قبل كده بس مفيش مانع برده نباركلك تاني

ثانيا ..جميلة جدا الحتة بتاعت النجوم دي
وربنا يجعلك ابرز النجوم عند اصدقائك واهلك واصحابك

 
At 10:03 AM, Blogger عاشقة الرحمن...سميه العريان said...

التشبيه عجبنى اوى

بس ليا اضافه وهى سمه اساسيه من سمات النجم وهى انه جسم معتم فى اصله

وهكذا نجد فى بعض الناس زى الفل من بره وهما قدام الناس وبعدين تكتشف فى اخر الامر انه من الداخل جسم معتم

 
At 11:41 AM, Blogger ahmad senosy said...

مبروك يا هيما على النجاح و عقبال التخرج و العروسة
انا كمان يا ابراهيم بحب البحر جدا و بحب النظر الى السماء و النجوم فعلا بيبقى منظر تحفة و جميل
بس اول مرة انظر للنجوم من نظرتك دى
بس الحمد لله ربنا انعم عليا بنجوم جميلة و منورة
و نفسى اروح اصيف . ربنا يسهل
سنوسى

 
At 1:08 PM, Blogger هاني جابر said...

ما شاء الله
مبروك علي النجاح وعقبال كل المدونين
وان شاء الله النجوم تيجي القاهره
او تعالي اسكندرية وانت تشوفها

 
At 2:03 PM, Blogger saiaf said...

مبروك يا ريس

و طبعا انت نجم صاطع فى سماءى( قدوة يعنى )

هاكونا مطاطا

 
At 2:34 PM, Anonymous Anonymous said...

السلام عليكم ورحمة الله وبركاته
انا ديما بقول
..ان الواحد محتاج كل فترة انه يفصل

يفصل دماغه عن اي حاجة تشغله

عشان يرجع بعد كدا يعرف يفكر كويس في كل حاجة.. يكتب في المدونة ،يحل مشكله ،يفكر حتي بطريقه احسن

فا كويس اوي ان حضرتك بتروح كل فترة
ماشاء الله نمسك الخشب :D
--------
بالنسبة بقي لحكايه النجوم
هوا علاقه الشخص بالناس المحيطين بيه
ليها تشبيهات كتير اوي
منها اللي حضرتك قلت عليه

همه فعلا زي النجوم

بس بختلف مع حضرتك في حاجة

ان في ناس (او نجوم) بننساهم احيانا
وممكن مش بيتركوا اثر فينا اوي

بس مش معني كدا انهم مش زينا اوي

الناس دي ممكن تكون ناس زينا او احسن

بس الزمن بقي :D

او احنا اللي مش عرفناهم اوي
الناس الواحد مش بيعرفها علي حقيقتها او يعرفها بجد الا لما يتعامل معاهم كتير


معلش الرد طويل كالعاده :(

 
At 3:44 PM, Blogger mo'men mohamed said...

السلام عليكم
انا حختصر معنى السعادة فى كلمتين حلوين قوى قرأتهم فى تفسير بن السعدى
وهو ان السعاده هى ان تخلص النية و العمل لله
وان تسعى فى حاجات الآخرين
وانا فعلا اجد ان تلك هى السعادة
السلام عليكم

 
At 5:00 PM, Blogger ahmed mefrh said...

اخشى من اليوم الذى ترى فيه النجوم فى عز الظهر

 
At 5:11 PM, Blogger محمد عباس said...

ده احساس الاديب يا عم الديب الكتكوت

بس انتا دايما كتاباتك بتبقة جميلة قوي يا دا يا شارقي

واحساس الكل بيحسه لكن مش الكل بيقدر يعبر عنه

 
At 5:30 PM, Blogger وائل_صح ولا غلط_ said...

شارقي ...عزيزي الطويل


اولا انا حاسس انك بتخبك فيا عشان الموقف بتاع يوم الخميس (لو كنت تعلم مابي كنت تعذرني)ا

بالنسبه للتدوينه

انا شايف ان كل واحد تعرفه لازم تتعلم منه الحاجه الكويسه ومش لازم يكون نجم عشان نتعلم منه
وان كان ده لا يغني عن وجود ناس قدوه ليك في حياتك
يسر الله لك
وبنا تليفون ...المره دي بجد مش زي المره اللي فاتت

 
At 6:06 PM, Blogger الفاتح اليعقوبي said...

خد نفسك معايا جامد واسرح وتخيل انك عمال تتطلع في السما فوق وبتطير بين النجوم وسيبت الدنيا بوجع دماغها انت طاير فوق مستريح اووووووووووووووي يعني النجوم دي مريحة جدا ياريتنا نقدر نطلعلها ونقعد وسطها

 
At 3:45 AM, Blogger mosaferfel7ayah said...

ها...يا الهى
لا اريد الارتباط بهذة المدونة او بصاحبها..حسنا ماذا كنا نقول
1- ما نحن محرومون منه فى المدينة ومنه التطلع للسماء..هذة احدى اساسيات ارائى

_ هل انت متأكد انك لست من قارئى الافكار_ ان لهذا التوافق عدة اسباب :اما اننا متقاربين باكثر مما يبدوا وهذا سيكون اكتشاف جميل , واما انك .... مررت بمب مررت انا به وتلك مصيبة _وانا بشط فيك من زمان _ , واما اننى لست كما اظن من الذين تتخاطر لهم المعانى وانما الجميع يتشاركون فيما افكر فيه . وهذا قليلا محبط

2- النجوم فى حياتنا
بالطبع وهم ما اعاننى على الحياة ولولا التشبث ببعض اماكن هؤلاء النجوم لهوى المرء منذ اماد بعيدة الى حيث لا يعود

شكرا شرقاووه
وشكرا زوار بتنفس بصعوبة

نادر

 
At 8:38 AM, Anonymous Anonymous said...

الف مبروك النجاح المهم نكون استفدنا من السنة اللى عدت دى وننفع الاسلام بيها ولوكنا مااستفدناش ننوى نية جديدة للسنة الجاية


فعلا المنظر دة روعة بجد خصوصا قبل ما الفجر يادن بساعة والمفروض ان احنا نتامل النعم وندرك عظمة اللهhttp://www.fotosearch.ae/DGV075/200169961-001/

http://www.fotosearch.ae/ICN119/f0006835/

http://www.fotosearch.ae/ICN213/f0008677/

http://www.fotosearch.ae/GLW288/gwt136024/

 
At 10:12 AM, Blogger Bent Elqran said...

السلام عليكم ورحمة الله وبركاته

ألف ألف مبرووووك على النجاح وعقبال السنه اللى جايه
ويارب تكون حياة حضرتك كلها نجاح وسعاده

فعلا النجوم وجمالها دى نعمه كبيره أوى جدا خالص من ربنا علينا

وربنا يجعلك من أبرز النجوم بين أصحابك

 
At 2:08 PM, Blogger عمر عاشق القرآن said...

مبروك النجاح وحمدالله على السلامة انا مشتاق لاسكندرية اللى بعشقها الحقيقة
______
اكيد فى حياة كل منا نجوم
المهم تنقى النجوم اللى ختمشى وراها صح علشان فيه ناس بتشوف كشاف نور كده او حتة لمبة معفنة وتفتكرها نجمة وتمشى وراها ,, وأكيد بتوه

 
At 10:14 AM, Blogger سلسبيل said...

مبروك لحضرتك على النجاح

وموضوع النجوم فعلا متعه

اغلب الناس محرومين منها

 
At 8:56 AM, Blogger شاب نفسة يحقق حلمة said...

بجد احساس رائع
بس ايه الغيبه الطويله دي
متبقاش تغيب عننا كتير كده تحياتي ليك
طارق الزمالكاوي

 
At 8:56 AM, Blogger شاب نفسة يحقق حلمة said...

نسيت اقولك مبروك النجاح

 
At 11:06 AM, Blogger cleopatra said...

السلااااااما عليكم .. بقالي تقريبا شهر مش بدخل البلوج الجميل ده

النجـــوم .. حاجه جميلة جدا .. درستها في فترة .. وجمعت عليها معلومات كتيرة ..

بس حقيقي في القاهره النجوم قليله جدا .. والسماء مش صافيه .. سواء كان من الادخنة .. او من الاتربة

هنا .. عدد النجوم كبير جداا .. احنا يوميا بنقعد مع بعض في الفيرندا ... السماء شكلها ساحر ... حقيقي جمال بنفتاقده في القاهره

 
At 4:54 PM, Blogger أحمد بن شلبي تكعيب said...

نجوم نبحث عنها معك

ونجوم اخرى تنتظر لحظة التجلي

ونجوم تحتار

ونجوم ... تسكن قلبي وقلبك

اهديك زهرة

"فهذه زهرة نبتت بتربي
بدت حمراء من ذوب قلبي
تقبلها بهذا القلب رفقا
وهذا القلب حسبي"

 
At 4:28 AM, Blogger Mai_Jeneen said...

التشبيه رائع

و ألف مبروك النجاح

 
At 1:26 AM, Blogger رضوى said...

انا جاية بعد الهنا بسنة

مبروك النجاح اخى

التشبية جميل اوى

الخاطرة كلها حلوة

بورك قلمكم

 
At 4:01 AM, Blogger شقاوة شعب said...

حتى النجوم اللى بنحبها قوى ودايما بتنور حياتنا احيانا الظروف بتحول بنا وبينها وبتشغلها عنا
وساعتها الواحد لازم يشيل كشافه بنفسه عشان مش دايما هيلاقى حد ينورله الطريق

 
At 7:22 AM, Blogger NeRmeeN said...

الف مبروك على النجاح ...وبالنسبة لموضوع النجوم فعلا ..النظر ليها متعة لوحده...ومع الاسف سكان المدن الكبيرة محرومين منها..لاننا اصلا مش بنشوف سما .حاجة كده رمادى دايما حاجبة لون السما الحقيقة وشكل النجوم عننا

تحياتى ليك

 
At 1:10 AM, Blogger محمد said...

ما شاء الله :)

مبارك أخي الحبيب النجاح .. أسعدتني والله

وحمدا لله على سلامتك

حقا الأصدقاء كالنجوم وإني بصدق أظنك أحد تلك النجوم التي ربما يبحث البعض عنها .. إحساسك رائع وتعبيرك أيضا

 
At 5:42 AM, Blogger اسلام رفاعى said...

عذرا للتحليق خارج السرب
من اجل رفع الظلم عن المظلومين
ادعوك للمشاركة فى حملة رفع الظلم عن طلاب الاسكندرية المختطفين
التفاصيل بمدونتى

 
At 10:12 PM, Blogger ســـارة said...

مبارك النجاح يا فندم

فعلاً هناك أناس في حياة كل منا زي النجوم الثابتة تهدينا في الظلام

تعبير رائع جداً .. سلمت يداك

 
At 6:43 PM, Blogger نداء خفي said...

خاطرة جميلة وموفقة

ومبروك على النجاح أخ شرقاوو

 
At 11:14 AM, Anonymous Anonymous said...

شكراً لربطك الرائع بين النجوم والبشر في حياتنا، مقارنة رائعة بالفعل. كل مرة بقراأ المدونة بتاعتك بعيد اكتشافك من جديد والاكتشاف ده ابتدأ من يوم العين السخنة.
حفظك الله نعم الأخ والصديق والقريب.

 

Post a Comment

<< Home