مذكرات طالب مطحون …

يعيش الإنسان فترات مختلفة في حياته تؤثر عليه كثيراً وتحتل فترة الإمتحانات مكانة خاصة جداً، فأنا آراها فترة يعشها الناس في اللا وعي تماما، فهي مرحلة إنقطاع كامل عما يدور في العالم الخارجي ( وقد يكون الداخلي أيضاً )، ولكن تحمل أيضاً الكثير من الذكريات والمواقف التي تظل معاك طول فترة الإمتحانات أو أي فترة إمتحانات آخرى في الطريق، ولكها سرعان ما تنتهي سريعاً مع أخر كلمة يخطها القلم في ورقة إمتحان آخر مادة في الإمتحانات، فالداخل إلي هذا الإمتحان ليس هو الخارج بأي شكل من الأشكال وسبحان مغير الأحوال ...

فالأجازة وخاصة الصيفية منها تحمل الكثير والكثير من الأحلام والأمنيات التي من أجلها ينسي الإنسان فترة التعب الشديد في الفترة السابقة، وبما أن تلك الفترة تذهب سريعاً من غير تسجل فأخذت قرار في داخلي محاولة كتابة تلك الفنرة بطريقة ما ... وبما أن تلك الفترة تعد عصيبة جداً جداً جداً وخاصة علي أمثالي الذي يعتبر آخر شهر هو المحدد دائماً لمستقبل هذه السنة ... وهي أيضاً محاولة لدفاع عن أهل تجارة الكرام والذين يتهمهم أهل الكليات الآخر إنها كلية سهلة وإلي يذاكر آخر يومين ينجح وكلام زي دا، وخاصة البني آدم إلي إسمه براء وانا بكلمه علي الموضوع وانا بكتبه يروح يقولي هو إنت فاكر نفسك طالب !!!! يعني عشان هو في هندسة وعنده 9 مواد الترم دا هيتكلم ... تباً لكل من يتكلم علي أهل تجارة بسوء ... ولكي لا تضيع تلك الذكريات وتذهب بلا عودة فهي فرصة لكتابتها ... يلا مش مهم علي رأي الأستاذ مجدي سعد …

فترة الكهرباء

الفترة الحالية يمكن نسميها فترة الكهرباء الزيادة في كل مكان ( يمكن هو دا سبب الحقيقي لإرتفاع الفاتورة ) فبسهولة شديد تكتشف إن الكهرباء في البيت عالية أوي يعني من نوعية إنت مش قاعد علي المكتب ليه يا بيه ( هي مش بتقال يا بيه بس إنتوا عرفيين الرقابة )، انت قاعد تاكل في عشر ساعات يلا خلص بسرعة دي الوجبة الخامسة عشر ( أوعي اللغة العربية يعني ) وتظل الكهرباء كدا عالية حتي الساعات الأخيرة من اليوم، ويا سيدي لو انت قاعد تذكر بليل ومحدش صاحي وقولت تريح شوية في البلكونة ولا قاعد مش بتعمل حاجة وتم رؤيتك علي هذا الوضع المشين فساعتها هتلاقي ..... ( الرقابة بتمنع حاجة كثير أوي الأيام دي ) وبردوا نفس الحاجة هتلاقيها أكيد لو لا قدر الله تم مشاهدك جالس علي ذلك الإختراع المدمر إلي إسمه الكمبيوتر، وانت طبعا رايح الجامعة إنت أتأخرت ليه يا .... ( تباً للرقابة ) وفي الجامعة يا سيدي هتلاقي كل دكتور بيحاول بشتي الطرق الممكنة ( والغير الممكنة بعض الأحيان ) تخليص المنهج، ويا عيني لو لم تروح محاضرة أو إثنين تدخل المحاضرة إلي بعدها تحس إنك دخلت مكان غلط ولا حاجة وتلاقي الراجل بشرح في حاجات غريبة يااااه دنيا والله، وتلاقي بقا أي واحد من بني آدم يقابلك في أي حتة يقولك يا تري عامل إيه في المذاكرة يا بني ( وخلي بالك من إبني دي كويس !!! ) بص يا حبيبي ( بردوا خلي بالك من كلمة حبيبي !!! ) لو عاوز أي حاجة أنا تحت أمرك وتلاقي البيع في الآخر هي السلعة الرائجة … يلا مش مهم تاني مرة علي رأي الأستاذ مجدي سعد …

هذاكر وأتحدي إلي جنبي

الفترة دي حاسمة في تاريخ الجامعات المصرية ( وبالأخص طبعاً جامعة القاهرة وأخص الخصوص كلية تجارة )، من خلال تجاربي الطويلة في التعليم عرفت ما معني الفرحة والحزن ويوم النتيجة ( يا دي وجع البطن إلي علي بدري دا )، وأن الأمر في النهاية ليس لك لوحدك، بل هو لك ولأهلك وأحبابك وأصدقائك وليس الأمر بالهين، وطبقاً للمعطيات السابقة فدا كان قرار بأني أذكر جامد جداً وإني أدحُ دحاً ( من دحدحة )،

عشان كدا لازم أبطل كتابة شوية وأتفضل بكل ذوق وإحترام ( الإحترام مفيد جداً وبتشعر ساعتها أنك من بني آدم ) أروح أذاكر بالذوق، لأن الدنيا مش ناقصة خالص، وهو في النهاية ما هو إلا تحدي شخصي لي في النهاية وربنا يسترها ....

حاجة كدا لم أكن ينفع أعدي التدوينة دي من غير ما أكون أنوه عنها، هي سعادتي الكبيرة والشديدة والغير طبيعية لبدأ أستاذي ودكتوري أحمد الجعلي التدوين علانيتاً بعد ما كان عملها سراً فترة طويلة، مدونة بجد أعتقد إنها سوف تجد فيها ما لا تجده في غيرها فصاحبها حدث عنه ولا حرج إنه الدكتور الجعلي صاحب المهام الصعبة والجولات البعيدة في الحياة الطويلة ( إيه الكلام الغريب دا ) ، بجد أنتظر الكثير من هذه المدونة ومضات شاهدوها سوف تجدون ما يسركم ....

آخر حاجة الأستاذ سيف الإسلام بدأ يعملي نيو لوك رهيب للمدونة وبجد حاجة كدا مية مية بس هنخليها مع بداية الصيف من أجل مستقبل منير، بس يا رب يكون في صيف أساساً وربنا يكتب إلي فيه الخير .....